Panembulu

PUISI

Karya SJAHRIR LAWIDE

Vueeeeeee.........
Ase kupobuku, tambaga kupuova
Njumangu leto, reso, lente bo maga
Posuandalaka riuve mpokayu, posuangaka riuve mpoili
Tora papasa nto Kaili

Vueeeeeee.........
Paka basa, paka bose, paka bisa nemo ra paka besi
Paka rasa, paka roso, paka risi nemo ra paka reso
Heeeeiii....
Komiu makumpu njumangu
Ri mpanau, ri mpandake, ri tasi bo pulu
Bisa ntotua kana apunai
Bisa ntotua kana waresi
Noa ntotua kana kengginisi
Hi ntotomo petevai toi sau


Peinta dodo tangara pakanasa
Nemo kadau-dau, kadui-dui, katui-tui
Nemo kakita-kita, kakoto-koto, kasaba-saba, kasabo-sabo
Dekeika belo ra poisi nulumbu
Posarara pakasangu, pakasiumpu masintuvu mosalunu

Anumo,
Pantika pakabelo, posuleka pakanara
Panembulu nu ibo, panembulu nu ule, panembulu nu taveve,
panembulu nu jara, panembulu nu timposu, panembulu nu tinggalu,
panembulu nto Kulavi, panembulu nto ri Sigi, panembulu nto ri Ganti,
panembulu nto ri Dombu, panembulu nto ri Omu, panembulu nto Pevunu,
panembulu nto Besusu, panembulu nto ri Sunju
Ka kumo..posiromu rapo ranggala nu buku.

Makumpu toi sau aga no mpabiye bo nesungiri
Natekaja toi sau tuli netanoto
Karampua ri langi nababomo panggisani
Panembulu domo nibila nu makumpu

Saperola......
Norate balengga toi sau

Kabere Ntavuni, Maret 1990